በአዲስ አበባ ከተማ የመሬት ወረራ ፈተና እየሆነ መምጣቱ ተገለፀ

Views: 294

በአዲስ አበባ ከተማ የሚስተዋለው የመሬት ወረራ ለከተማው አስተዳደር ፈተና እየሆነ መምጣቱ ተገለጸ።

የፌዴራል ስነ ምግባርና ጸረ ሙስና ኮሚሽን ከመሬት አስተዳደር ጋር በተያያዘ በአዲስ አበባ ከተማ የሚስተዋለውን ብልሹ አሰራር በተመለከተ ከባለድርሻ አካላት ጋር ውይይት እያካሄደ ነው።

ሙስናና ብልሹ አሰራር፣ የመረጃ አያያዝ ማነስ፣ የግልጽነትና ተጠያቂነት ችግሮች ከህግ ስርአቶች አለመከበር ጋር ተዳምረው ለመሬት ወረራው መስፋፋት ምክንያት ሆነዋል ተብሏል።

የአዲስ አበባ ከተማ አስተዳደር አመራሮች፣ የሃይማኖት አባቶች ፣የሚመለከታቸው አካላት እና ሌሎች ተጋባዥ እንግዶች በውይይት መድረኩ ላይ እየተሳተፉ ነው።

የአዲስ አበባ ከተማ አስተዳደር መሬት ልማት ቢሮም፥ በከተማዋ ህገወጥ የመሬት ወረራ እና ተያያዥ ችግሮችን አስቀድሞ ለመከላከል እና አስፈላጊውን እርምጃ ለመውሰድ የመሬት መረጃ አያያዝ ስርዓቱን የማዘመን ስራ በትኩረት እየተሰራ መሆኑን ገልጿል ።

በቀጣይ ችግሩን ለመቅረፍ በቂ በሚባል ደረጃ የማስተካከያ እርምጃ ለምን መውሰድ አልተቻለም በሚል ርእሰ ጉዳይ ላይም ውይይት እየተካሄደ ነው።

በውይይቱ ላይ የተገኙት የክፍለ ከተማ አመራሮች እና ባለድርሻ አካላት በአዲስ አበባ ደረጃ ችግሩን ለመፍታት ምን መደረግ አለበት በሚለው ላይም እየተወያዩ ነው ሲል የዘገበው ኤፍ ቢ ሲ ነው።

Comments: 0

Your email address will not be published. Required fields are marked with *

This site is protected by wp-copyrightpro.com