ቡሌ ሆራ ዩንቨርሲቲ የገዳ ሥርዓትን በማስተርስ ደረጃ ሊያስተምር ነው

Views: 62

ቡሌ-ሆራ ዩኒቨርሲቲ፣ የገዳ ሥርዓት ትምህርትን በማስተርስ ደረጃ መስጠት መጀመሩን በዩኒቨርሲቲው የገዳ እና የባህል ጥናት ዳይሬክተር የሆኑት ረዳት ፕሮፌሰር ሮባ ደምቢ ገልጸዋል፡፡

ዩንቨርስቲው ትምህርቱን መጀመር የፈለገበት ዋና ዓላማ ሥርዓቱን ለአዲሱ ትውልድ ለማሳወቅ እንዲሁም ሥርዓቱን እንደ ቅርሱ ለሚቆጥረው ሕዝብ በጥልቀት እንዲያውቀው ታስቦ መሆኑን አቶ ሮባ ተናግረዋል።

የገዳ ሥርዓት ትምህርቱን በማስተርስ ደረጃ ለመስጠት ካሪኩለም ከመቅረፅ በፊት ለመጀመሪያ ዲግሪ ተማሪዎች በሙሉ እንደ ‘ኮመን ኮርስ’ እንዲሰጥ ተሠርቷል ያሉት ረዳት ፕሮፌሰር ሮባ፣ ሁሉም የመጀመሪያ ዲግሪ ተማሪዎች ኮርሱን ሳይወስዱ መመረቅ እንደማይችሉ ዩኒቨርሲቲው ውሳኔ ላይ መድረሱን ተናግረዋል።

ቡሌ ሆራ ዩኒቨርሲቲ መሬት ላይ ያለውን እውነታ የሚያጠና ቡድን አቋቁሞ በጥልቀት ጥናት ማካሄዱን እና ቡድኑም አሁን ያለው የገዳ ሥርዓት በተጨባጭ ወደ ትምህርት መግባት አለበት የሚል ድምዳሜ ላይ መድረሱን  አክለው ገልጸዋል።

ከዚህ በፊት በተሰሩ ጥናቶች በብዛት ሲሰጡ የነበሩት ምክረ ሀሳቦች ገዳ ወደ ትምህርት ካሪኩለም ገብቶ ትውልዱ እንዲማረው ሀሰቦች ሲቀርቡ ነበርም ብለዋል አቶ ሮባ፡፡

በሌላ በኩል የገዳ ሥርዓትን በትምህርት ሥርዓቱ ውስጥ ለማካተት ከጅማ፣ ሐሮማያ እና ወለጋ ዩኒቨርሲቲዎች ጋር ምክክር መደረጉንና በገዳ ሥርዓት ዙሪያ ጥናት ያካሄዱ ሰዎችንም አስተያየት እንደ ግብዓት መወሰዱን ዳይሬክተሩ አሳውቀዋል።

ቡሌ ሆራ ዩኒቨርሲቲ የገዳ ሥርዓትን ማጥናት የጀመረው ከ2009 ዓ.ም ጀምሮ መሆኑን እና በሥርዓቱ ላይ ጥናት የሚያደርግ ኢንስቲትዩት በ2011 ዓ.ም በይፋ አስመርቆ ወደ ሥራ መግባቱንም አቶ ሮባ ተናግረዋል።

ከ2012 የትምህርት ዘመን ጀምሮ ሁሉም የመጀመሪያ ዲግሪ ተማሪዎች ኮርሱን እንዲወስዱ ለማድረግ በካሪኩለም ተካትቷል ነው ያሉት።

በ2012 የትምህርት ዘመን 10 ተማሪዎች ትምህርቱን ለመውሰድ የተመዘገቡ መሆኑን የገለጹት ረዳት ፕሮፌሰር ሮባ፣ ወደ ፊት ትምህርቱን የሚሰጡ መምህራንን ቁጥር በመጨመር የዩኒቨርሲቲውን የቅበላ አቅም ለማሳደግ እንደሚሠራ ገልጸዋል።

በመጨረሻም የገዳ ሥርዓት እና የሰላም ትምህርት ላይ ለመሳትፍ ፍላጎቱ ያላቸው የማኅበራዊ ሳይንስ ትምህርት ዘርፍ ተማሪዎች በሙሉ ትምህርቱን በማስተርስ ደረጃ መውሰድ ይችላሉ ተብሏል።

(ዘገባው የኢቢሲ ነው)

Comments: 0

Your email address will not be published. Required fields are marked with *

This site is protected by wp-copyrightpro.com