ዜና

አንዳንድ ምዕራባዊያን አገራት በኢትዮጵያ የውስጥ ጉዳይ የሚያደርጉትን ጣልቃ ገብነት እንደምትቃወም ኢራን አስታወቀች

Views: 37
አንዳንድ የምዕራባዊያን አገራት በሰብዓዊ መብት ስም ኢትዮጵያን ጨምሮ በሌሎች አገራት የውስጥ ጉዳይ የሚያደርጉትን ጣልቃ ገብነት ኢራን በጽኑ እንደምትቃወም በኢትዮጵያ የኢራን አምባሳደር ሰመድ አሊ ላኪዛዴህ ገለጹ፡፡
አምባሳደሩ ሰብዓዊ እሴቶች ለሁላችንም ዋጋ ያላቸው ሃብቶች በመሆናቸው የምዕራባዊያንን ጣልቃ የመግባት ፍላጎት ለማሟላትና ለእጅአዙር ቅኝ ግዛት ማስፈጸሚያ ሲባል መሸርሸር የለባቸውም ብለዋል፡፡
በዚህም አንዳንድ ምዕራባዊያን ሀገራት ሰብዓዊነት የሚሉትን ተረክ በማንሳት በኢትዮጵያ ላይ የሚያደርጉት ጫና ህገ ወጥና ተቀባይነት የሌለው መሆኑን ጠቅሰው ኢራን ይህንን ድርጊት እንደምትቃወም ተናግረዋል፡፡
አገራቱ ጠንካራ፣ ነጻና ሉዓላዊነቷ የተከበረ ኢትዮጵያን ማየት ስለማይፈልጉ ሰብዓዊ ጥሰቶችን በመጥቀስ በኢትዮጵያ ላይ ጫና እያደረጉ ነው ብለዋል፡፡
ኢትዮጵያ ከአፍሪካ ሀገራት በቅኝ አገዛዝ ስር ያልወደቀች ብቸኛ ሀገር መሆኗን ያስታወሱት አምባሳደሩ የኢትዮጵያ ነጻነት በመላው ዓለም የጸረ-ቅኝ አገዛዝ ንቅናቄን በማነሳሳት ይታወቃል ብለዋል፡፡
የምዕራባዊያን ሀገራት ላለፉት 42 ዓመታት በኢራን ላይ ሁሉንም አይነት ጫና ሲያደርጉ መቆየታቸውን ገልጸው ከዚህ አኳያ “ሰብዓዊ መብት” በማለት በኢትዮጵያ ላይ እያደረጉት ያለውን ጣልቃ ገብነት ኢራን ትገነዘባለች ሲሉም አክለዋል፡፡
የምዕራባዊያን ጣልቃገብነት ሊቢያ፣ ሶሪያ፣ የመን፣ አፍጋኒስታንና ሌሎች መሰል ሀገራትን ለከፋ ቀውስ መዳረጉንም ገልጸዋል፡፡
ኢትዮጵያ የምዕራባዊያኑን ጫናና ጣልቃ ገብነት በመቃወም የምታደርገው ትግል በርካታ አፍሪካዊያን የእጅ አዙር ቅኝ አገዛዝን እንዲታገሉ እንደሚያነሳሳ አብራርተዋል፡፡
ኢራን የምዕራባዊያኑን ጫናና ማዕቀብ የተቋቋመችበትን ልምድ ለኢትዮጵያና ሌሎች ወዳጅ ሀገራት ለማካፈል ፈቃደኛ መሆኗን አረጋግጠዋል፡፡
ኢትዮጵያና ኢራን ረዥም ዘመናትን ያስቆጠረ ግንኙነት እንዳላቸው አስታውሰው ኢራን የሀገራቱ ግንኙነት ይበልጥ ማጠናከር እንደምትሻ መናገራቸውን ኢዜአ ዘግቧል፡፡
Comments: 0

Your email address will not be published. Required fields are marked with *

This site is protected by wp-copyrightpro.com