ዜና

“የብሔራዊ መግባባት ውይይቱ ጫፍ እና ጫፍ የረገጡ ሐሳቦችን ለማቀራረብ ያስችላል”፦ ፕሮፌሰር በየነ ጴጥሮስ

Views: 39
በቀጣይ ጊዜያት በሀገር ደረጃ ይደረጋል ተብሎ የሚጠበቀው ብሔራዊ መግባባት ውይይት ጫፍ እና ጫፍ የረገጡ ሐሳቦችን ለማቀራረብ ያስችላል ሲሉ የኢትዮጵያ ሶሻል ዲሞክራቲክ ፓርቲ ሊቀመንበር ፕሮፌሰር በየነ ጴጥሮስ ተናገሩ።
ፕሮፌሰር በየነ ጴጥሮስ እንደገለጹት፣ በተለያዩ ምክንያቶች በሕዝቡ መካከል የተፈጠሩ ፅንፎች በመኖራቸው በሀገራችን ትናንሽ ጉዳዮችም ጭምር እየገዘፉ የጭቅጭቅ ምንጭ ሲሆኑ ይታያሉ፤ አንዳንዶቹም ሐሳቦች የማይቀራረቡ የሚመስሉ ናቸው። ስለሆነም የሚደረገው ውይይት ጫፍ እና ጫፍ የረገጡ ሐሳቦችን በማቀራረብ ወደ መሃል እንዲመጡ የማድረግ አቅም አለው።
በሚደረገው ምክክር እና ውይይት በተቻለ መጠን የሐሳብ መቀራረብ መፍጠር እንዲቻል በታላላቅ ከተሞች ከሚደረግ የታዋቂ ሰዎች እና ልሂቃን ውይይት ባለፈ እስከ ወረዳ ብሎም ቀበሌ ድረስ ወርዶ ሕዝቡን ተደራሽ ያደረገ ውይይት መደረግ እንዳለበት ጠቁመዋል።
ብሔራዊ መግባባት ሰፊ እንድምታ ያለው ጉዳይ በመሆኑ ረዘም ያለ ውይይት እና ምክክር የሚፈልግ እንጂ በጥቂት ጉባኤዎች የሚቋጭ ጉዳይ አይደለም።
በመሆኑም እንደ ሀገር በሚደረገው ብሔራዊ መግባባት ውይይት ላይ በየደረጃው የሚገኘው ሕዝብ ድምፅ በአግባቡ እንዲደመጥ ዕድል መፍጠር ያስፈልጋል ብለዋል።
እንደ ፕፎፌሰር በየነ ገለጻ፣ ምክክሩ የሚጠበቀውን ውጤት እንዲያስገኝ ውይይቱን የሚመሩ አካላት በሕዝቡ ዘንድ ተቀባይነት ያላቸው እንዲሆኑ ማድረግ እና በሂደቱ የሕዝብን ሐሳብ ማካተት አስፈላጊ ነው።
በተጨማሪም ቅድሚያ ሊሰጣቸው የሚገቡ አጀንዳዎች ምን ምን ናቸው የሚለውን መለየት እና በሂደቱ ላይ ማን ከማን ጋር በምን ጉዳይ ላይ መግባባት ላይ መድረስ አለበት የሚለውም በዝርዝር መታየት አለበት ብለዋል።
በምክክር ሂደቱ ብዙ ጊዜ አደባባይ የሚታዩ እና የሚናገሩ ልሂቃንን እና ፖለቲከኞችን ብቻ በማካተት ብሔራዊ መግባባት ላይ እንደማይቻል ጠቁመው፤ ወረድ ብሎ የሁሉንም ሕዝብ ድምፅ ማካተት እንደሚገባ አስገንዝበዋል።
በጉባኤዎች ከሚነሱ ሐሳቦች ባለፈ እንደ ሀገር መግባባት ላይ ለመድረስ ሕዝበ ውሳኔ የሚያስፈልጋቸው አንዳንድ አንኳር ጉዳዮች ከተፈጠሩም ሕዝበ ውሳኔ እስከ ማካሄድ ድረስ ለመሄድ መዘጋጀት አስፈላጊ መሆኑን አስረድተዋል።
ለዘመናት የሕዝብን ሐሳብ ለማካተት በሚል በሚካሄዱ ውይይቶች የመንግሥት ካድሬዎች ሕዝቡን ነፃነት ሲነፍጉ እና ሐሳቡን በመግለጹ ብቻ ማዋከብ ይስተዋል እንደነበር ያስታወሱት ፕፎፌሰር በየነ ጴጥሮስ፤ ውይይቱ የካድሬዎች ሳይሆን ሕዝቡ በነጻ ተሰብስቦ ለሀገር ጠቃሚ ሐሳብ ሊያወጣ የሚችልበትን ምቹ ሁኔታ መፍጠር እንደሚገባ መግለጻቸውን ኢፕድ ዘግቧል።
ዝምታ ለሀገር ሰላም አያመጣም ያሉት ሊቀመንበሩ፤ ሂደቱ የቱንም ያህል አድካሚና ፈታኝ ቢሆን እንኳን መንግሥት፣ ሕዝቡ እና ሌሎችም ባለድርሻ አካላት ለሐሳቡ መሳካት የሚጠበቅባቸውን ኃላፊነት መወጣት እንዳለባቸው ጠቁመዋል።
Comments: 0

Your email address will not be published. Required fields are marked with *

This site is protected by wp-copyrightpro.com