ዜና

አሸባሪው የህወሓት ቡድን ለትግራይ ህዝብ ሰብዓዊ ድጋፍ እንዳይቀርብ እንቅፋት ሆኗል – የመንግሥት ኮሙኒኬሽን አገልግሎት

Views: 35
የትግራይ ክልል ህዝብ ሰብዓዊ የምግብና ምግብ-ነክ ያልሆነ እርዳታ ያለ ምንም መስተጓጎል እንዲቀርብለት፣ የክልሉ አርሶ አደር የክረምት ዝናብን በመጠቀም የራሱን ምርት እንዲያመርትና ከዕርዳታ እንዲላቀቅ መንግስት ሰብዓዊነትን ማዕከል ያደረገ የተናጠል የተኩስ አቁም ማድረጉ ይታወሳል።
ይሁንና የአሸባሪው የህወሓት ቡድን ይህን በጎ ዓላማ ያነገበውን የመንግሥት የተናጠል ውሳኔ ወደ ጎን በማድረግ የፀረ-ህዝብ እና የሽብር አቋሙን በግልፅ ያሳየበትን ተግባር የአማራና አፋር ክልሎችን በመውረር እንዲሁም በክልሎቹ በሚገኙ ንጹሃን ላይ እጅግ ዘግናኝ ወንጀሎችን በመፈጸም ለእኩይ ዓላማ የቆመ ቡድን መሆኑን በግልፅ አስመስክሯል።
መንግሥት ለትግራይ ህዝብ ባለው ውግንና እና የዕለት ደራሽ ዕርዳታ ያለ ምንም መስተጓጐል በአፋር ክልል በአብአላ በኩል በቀጥታ ወደ ትግራይ ክልል እንዲጓጓዝ ባስቀመጠው አቅጣጫ እንዲሁም የአፋር ክልል መንግሥትና ህዝብ ለትግራይ ክልል ባላቸው አጋርነት እ.ኤ.አ ከሐምሌ 12/2021 ጀምሮ በ1010 ከባድ የጭነት ተሽከርካሪዎች ከአጋር አካላት ጋር በመተባበር የሰብዓዊ ዕርዳታ እንዲቀርብ ተደርጓል።
ይሁን እንጂ የአሸባሪው የህወሓት ቡድን የትግራይን ህዝብ በስም ለመነገጃነት ከማዋል ውጪ ቆሜለታለሁ ብሎ ለሚሰብከው ህዝብ እንኳ ሰብዓዊነት የማይሰማው በመሆኑ ዕርዳታ ጭነው ወደ ክልሉ የገቡት 1ሺ10 ተሽከርካሪዎች ተመልሰው ዕርዳታ ጭነው ወደ ክልሉ እንዲመለሱ በማድረግ ፋንታ የአሸባሪው የህወሓት ቡድን ወራሪ ኃይል አማራና አፋር ክልልን ሲወር የሠራዊቱ ማጓጓዣ አድርጐ ተጠቅሞባቸዋል።
ይባስ ብሎ በጊዜያዊነት ወረራ አድርጐ ከቆየባቸው እንደ ኮምቦልቻና ሌሎች አካባቢዎች ከሚገኙ የመንግሥትና የግል መጋዘኖች የዘረፈውን ስንዴና ሌሎች ምግብና ምግብ – ነክ ያልሆኑ አቅርቦቶች በትግራይ ክልል በሚገኙ መጋዘኖች ካከማቸ በኋላ ወደ ትግራይ ክልል ዕርዳታ ማስገቢያ በሆነው በአብዓላ መስመር ወረራ በማካሄድና የከባድ መሣሪያ ተኩስ በመክፈት መስመሩ እንዲዘጋ በማድረግ እ.ኤ.አ. ከዲሴምበር 15/2021 ጀምሮ ዕርዳታ እንዳይቀርብ አስተጓጉሏል።
እንደ አለም ጤና ድርጅት አይነት ለሁሉም ሰው በእኩል ቆመናል የሚሉ ዓለም አቀፍ ተቋማት ግን አሸባሪው ቡድን የአማራ እና አፋር ክልሎችን በወረረበት ወቅት ሆስፒታሎችን እና የጤና ጣቢያዎችን ሲዘርፍና ሲያወድም ንፁሃንን ሲደፍርና ሲገድል የሽብር ቡድኑን ድርጊት ሲያወግዙ አልተደመጡም።
ይልቁንም መንግስት ወደ ትግራይ ክልል እርዳታ እንዳይገባ እያደረገ ነው በሚል የአሸባሪው ቡድን የሚያሰማውን ፕሮፖጋንዳ ተቀብለው እያስተጋቡት ይገኛል፤ ይህ በመንግስት ዘንድ ፍፁም ተቀባይነት የለውም።
አሁንም ለአንድ ወገን ባጋደለው አቋማቸው በመጽናት የሽብር ቡድኑ ወደ ትግራይ የሰብአዊ እርዳታ እንዳይገባ እንቅፋት መሆኑን በግልጽ አለማንሳታቸው በተዛባ አመለካከታቸው መጽናታቸውን እና ውግንናቸው ለህዝብ ጥቅም ሳይሆን ለፖለቲካ አጀንዳ መሆኑን ያመለክታል።
የኢትዮጵያ መንግሥት ለትግራይ ክልል ህዝብ የዕለት ደራሽ እርዳታ ያለ ምንም መስተጓጎል እንዲቀርብ ለማስቻል በየጊዜው ከአጋር አካላት ጋር ምክክር በማድረግ እየሠራ ይገኛል።
ምንም እንኳ ቀደም ብለው እርዳታ ጭነው ወደ ትግራይ ክልል ገብተው ያልተመለሱ 1ሺ10 ከባድ ተሽከርካሪዎች በክልሉ መኖራቸውን እያወቀ በዓለም ምግብ ፕሮግራም ባለቤትነት ሥር ያሉ 118 ከባድ ተሽከርካሪዎች በሙሉ አቅማቸው የእርዳታ ማጓጓዝ ሥራ እንዲሰሩ ፈቅዷል፤ እርዳታውን ለሚያጓጉዙ ሾፌሮችም ሙሉ የደህንነት ዋስትና እንዲያገኙ አድርጓል።
ከዚህም በላይ በቀጣይነት የሚያጋጥሙ ችግሮችን ለመፍታትና የዕርዳታ አቅርቦቱ ያለ እንቅፋት እንዲከናወን ለማድረግ ያለው ቁርጠኝነት እንደተጠበቀ ነው።
በመጨረሻም የዓለም አቀፉ ማህበረሰብና አጋር አካላት የአሸባሪውን የህወሓት ቡድን እኩይ ተግባርና የእርዳታ እንቅስቃሴ አደናቃፊነት እንዲኮንኑ እያሳሰብን መንግሥት እንደ ወትሮው የዕርዳታ አቅርቦቱ ተጠናክሮ እንዲቀጥል ለማድረግ የበኩሉን ሁሉ እንደሚወጣ እንገልጻለን።
የመንግስት ኮሙኒኬሽን አገልግሎት
Comments: 0

Your email address will not be published. Required fields are marked with *

This site is protected by wp-copyrightpro.com