ዜና

በአጣዬና አካባቢው የተፈጸመውን የወንጀል ድርጊት የሚያጣራ የምርመራ ቡድን ወደ ስፍራው ተላከ

Views: 61

በአጣዬና አካባቢው በሰብአዊና ቁሳዊ ሃብት የተፈጸመውን የወንጀል ድርጊት የሚያጣራ የምርመራ ቡድን ወደ ስፍራው መላኩን የአማራ ክልል ጠቅላይ ዐቃቤ ሕግ አስታወቀ።

ዐቃቤ ሕጉ አቶ ገረመው ገብረጻዲቅ ለኢዜአ እንደገለጹት፤ የተላከው ቡድን ከፌዴራልና ክልል ጠቅላይ ዐቃቤ ሕግና ፖሊስ የተውጣጡ አባላት ይዟል።
በአጣዬና አካባቢው በሰው ህይወት መጥፋት፣ በአካል መጉደል፣ በንብረት መውደምና በሰዎች መፈናቀል የደረሰው ጥፋት ተራ ግጭት ሳይሆን ለዘመናት የተገነባ ከተማን ያወደመ አስከፊ የወንጀል ድርጊት መሆኑን አመልክተዋል።

የወንጀል ድርጊቱን በልዩ ትኩረት ለማጣራት የፌዴራልና የክልሉ ተቋማት የጋራ የምርመራ ቡድን በማቋቋምና እቅድ በማውጣትና አቅጣጫ በማስቀመጥ ወደ ስራ መገባቱን ተናግረዋል።

በደረሰው ሰብአዊና ቁሳዊ ሃብት ውድመት ተሳታፊ የሆኑ አካላትን በቁጥጥር ስር በማዋል ለህግ የማቅረብ ስራ እንደሚከናወን ያመለከቱት ዐቃቤ ሕጉ፤ የምርመራ ቡድኑ ባጭር ጊዜ ውስጥ ስራውን ከማጠናቀቅ ባሻገር በማጣራት ሂደቱ የሚገኘውን ውጤት በተከታታይ ለህዝቡ የሚገልጽ መሆኑን ጠቁመዋል።

የታክቲክና የቴክኒክ ስልቶችን ተጠቅሞ በሚከናወነው ምርመራ የአካባቢው ማህበረሰብ ትክክለኛ መረጃ በመስጠት፣ ማስረጃ በማቅረብና ምስክር በመሆን እንዲተባበር ጠይቀዋል።

በተመሳሳይም በማዕከላዊ ጎንደር ጭልጋ አካባቢ ከቅማንት ማንነት ጋር በተያያዘ በተደጋጋሚ የሚፈጸመውን የወንጀል ድርጊት የሚያጣራ መርማሪ ቡድን ወደ ስፍራው መላኩን ተናግረዋል።

በክልሉ በየትኛውም አካባቢ የሚፈጸሙ የወንጀል ድርጊቶችን ማስቆም የሚቻለው በየደረጃው የህግ የበላይነትን ማረጋገጥ ሲቻል መሆኑን ህብረተሰቡ በመገንዘብ ተባባሪ እንዲሆን ጠይቀዋል፡፡

የክልሉ ጠቅላይ ዐቃቤ ሕግ የህግ የበላይነትን በማረጋገጥ የህዝቦችን ደህንነት ለመጠበቅ የበኩሉን ድርሻ ለመወጣት በቁርጠኝነት እንደሚሰራ አረጋግጠዋል።Top of Form

Comments: 0

Your email address will not be published. Required fields are marked with *

This site is protected by wp-copyrightpro.com