ዜና

‹‹የግብጽ ጩኸት ኢትዮጵያ ከበለጸገች የአፍሪካ የኃይል ሚዛን ወደሷ ያጋድላል ከሚል ሥጋት ይመነጫል›› ፕሮፌሰር ተሰማ ዘውዱ

Views: 50

የግብጽ ጩኸት ኢትዮጵያ ካደገችና ከበለጸገች የአፍሪካ የኃይል ሚዛን ስለሚያጋድል ተቀባይነትና ተደማጭነት አጣለሁ ከሚል ስጋት የመነጨ ነው ሲሉ የደባርቅ ዩኒቨርሲቲ የምርምርና ማህበረሰብ አገልግሎት ምክትል ፕሬዚዳንት ፕሮፌሰር ተሰማ ዘውዱ ገለጹ።

ግብጽ ለብዙ ዓመታት የሚያገለግላት ውሃ በከርሰ ምድር አስቀምጣለች፤ በነፍስ ወከፍ ደረጃ ያላት የውሃ ክምችትም ከኢትዮጵያ በላይ ነው፤ ከፍተኛ የመብራት አገልግሎት ተጠቃሚ መሆኗንም አመልክተዋል።

ፕሮፌሰር ተሰማ ዘውዱ እንደገለፁት፤ የግብጽ ጩኸት ኢትዮጵያ ካደገችና ከበለፀገች የአፍሪካ የኃይል ሚዛን ወደ ኢትዮጵያ ስለሚያጋድል ተቀባይነትና ተደማጭነት አጣለሁ ከሚል ስጋት የሚመነጭ እንጂ ውሃ አጥታ አይደለም።

የህዳሴው ግድብ በከፍተኛ የጥራት ደረጃ የሚሰራ ነው፣ ግድቡ ከተጠናቀቀ በኋላ ሌሎች ግድቦችን ለመሥራት መዘጋጀት ያስፈልጋል ያሉት ፕሮፌሰሩ፣ የውሃ ሀብታችንን በፍትሀዊነት የመጠቀም መብት እንዳለን አስታውቀዋል።

ከ85 በመቶ በላይ ውሃው ከኢትዮጵያ እየፈሰሰ የግብጽን የልብ ትርታ ተከትሎ የሚሰራ መሆን የለበትም ብለዋል። የአካባቢውን ተጠቃሚነት ከግምት አስገብቶ መገንባት የኢትዮጵያ መብት መሆኑንም እንዲሁ።

በእዚህ ሁኔታ ውሃው የግብጽ ቢሆን ኖሮ አንድም ኩባያ ውሃ አያስቀዱንም ነበር ብለዋል።

በአሁኑ ጊዜ በተለይ ወደፊት አንድ ኩባያ ውሃ ከነዳጅ በላይ ውድ ሊሆን የሚችልበት አጋጣሚ ሰፊ ነው ያሉት ፕሮፌሩ፣ ምክንያቱም ነዳጅ እየጠፋ ስለሚሄድ ወደፊት ነዳጅ የሚጠቀሙ በሙሉ በታዳሽ ኃይል የሚሰሩበት አጋጣሚ ይመጣል፣ ስለዚህ የውሃ ሀብት በቀላሉ አይታይም ብለዋል፡፡

የውስጥ ችግራችንን ፈትተን በግድብ ግንባታ ላይ ተረባርበን በማጠናቀቅ ወደ ሌሎች ግንባታዎች መሄድ ያስፈልጋል ያሉት ፕሮፌሰር ተሰማ፤ ”የውጭ ሃይሎች የሚሰጡንን አጀንዳ ተቀብለን መጋጨት የለብንም” ብለዋል።

ግብጽ ለበርካታ ዓመታት የሚያገለግላት ውሃ በከርሰ ምድር እንዳላት ያመለከቱት ፕሮፌሰሩ፤ በነፍስ ወከፍ ደረጃ ያላት የውሃ ክምችት ከኢትዮጵያ በላይ በመሆኑ ከፍተኛ የመብራት አገልግሎት ተጠቃሚ መሆኗንም አመልክተዋል።

እንደርሳቸው ማብራሪያ፤ የጀመርነውን ግድብ እንዳንጨርስ ከፍተኛ ጫናዎች አሉ፣ ጫናዎች ቢበረቱም ግድቡ መሞላቱ ስለማይቀር ማሰብ ያለብን ደልልን መከላከልና የአካባቢውን ሥነ ምህዳር መጠበቅ ላይ ነው።

ግድቡ ተሰርቶ ከማለቁ በፊት የኤሌክትሪክ ኃይሉን ወደሚፈለገው ቦታ ለማድረስ መሰረተ ልማቶች ተሰርተው መጠናቀቅ እንዳለባቸው ጠቁመው፣ ለበርካታ ዓመታት ከፍተኛ መስዋትነት የከፈልንበት ፕሮጀክት መጨረሻ ላይ ብክነት ላይ መዋል ስለሌለበት ቀድሞ ዝግጅት መደረግ እንደሚያስፈልግ መናገራቸውን ኢፕድ ዘግቧል።

Comments: 0

Your email address will not be published. Required fields are marked with *

This site is protected by wp-copyrightpro.com