ዜና

በኢትዮጵያ በኮሮና ተይዘው ወደ ህክምና ማዕከላት ከሚገቡት 100 ሰዎች መካከል 83ቱ ኦክስጅን ይፈልጋሉ

Views: 41

ቫይረሱ የተገኘባቸው ሰዎች ቁጥር ከ250 ሺህ ማለፉን የኢትዮጵያ ህብረተሰብ ጤና ኢንስቲትዩት አስታውቋል:: በፅኑ ህሙማን ክፍል ውስጥ ከሚገኙ 987 ታማሚዎች መካከል 110ሩ ሰው ሰራሽ የመተንፈሻ መሳሪያ ላይ የሚገኙ ናቸው ተብሏል፡፡

በኢትዮጵያ የኮቪድ-19 ቫይረስ መገኘቱ ከተረጋገጠ እለት ጀምሮ እስከ ሚያዝያ 16 ቀን 2013 ዓ.ም ድረስ 250 ሺ 955 ሰዎች ቫይረሱ እንደተገኘባቸው በምርመራ መረጋገጡን የኢትዮጵያ ህብረተሰብ ጤና ኢንስቲትዩት አስታውቋል።

ኢንስቲትዩቱ እስካሁን በአጠቃላይ ለ2 ሚሊዮን 544 ሺ 95 ሰዎች በቫይረሱ መያዛቸውን ለመለየት የሚያስችል የላብራቶሪ ምርመራ መደረጉን አስታውቋል፡፡

57‚409 ሰዎች በአሁኑ ሰዓት በቫይረሱ ተይዘው ይገኛሉ፡፡ 190‚013 ሰዎች ከበሽታው ያገገሙ ሲሆን፣ 3‚531 ታማሚዎች ደግሞ ህይወታቸውን አጥተዋል፡፡

እስከ ትናንት ድረስ ባለው መረጃ 987 ታማሚዎች በፅኑ ህሙማን ክፍል ውስጥ ይገኛሉ፡፡ ከእነዚህም ውስጥ 110 ግለሰቦች ሰው ሰራሽ የመተንፈሻ መሳሪያ ላይ የሚገኙ ናቸው፡፡

ወደ ኮቪድ-19 ህክምና ማዕከል ከሚገቡት 100 ግለሰቦች 83 የሚሆኑት በተለያየ መጠን ኦክስጅን የሚያስፈልጋቸው ናቸው፡፡ በመሆኑም እያንዳንዱ ሰው ማስክ ማድረግ፣ አዘውትሮ እጅን በሳሙና እና በውሃ በመታጠብ ወይም በሳኒታይዘር በማፅዳት እና አካላዊ ርቀትን በመጠበቅ ራሱን እና ቤተሰቡን እንዲሁም ማህበረሰቡን ከበሽታው እንዲጠብቅ ኢንስቲትዩቱ ጥሪ አቅርቧል፡፡

በአንድ ወር ውስጥ ከግማሽ ሚሊዮን በላይ ሰዎች የቫይረሱን ክትባት አግኝተዋል መባሉ የሚታወስ ነው፡፡

Comments: 0

Your email address will not be published. Required fields are marked with *

This site is protected by wp-copyrightpro.com