ዜና

የዓለም ባንክ ለኢትዮጵያ 907 ሚልዮን ዶላር ድጋፍ አደረገ

Views: 49

የዓለም ባንክ በኢትዮጵያ ለሚተገበሩ ሶስት ፕሮጀክቶች 907 ሚሊዮን ዶላር የድጋፍ ስምምነት አድርጓል። ስምምነቱ በኢትዮጵያ መንግስት እና በዓለም ባንክ የ907 ሚሊዮን ዶላር ድጋፍ የተፈረመ ሲሆን፤ ስምምነቱን የገንዘብ ሚኒስትሩ አቶ አህመድ ሽዴና የዓለም ባንክ ግሩፕ የኢትዮጵያ ዳይሬክተር ኦስማን ዲዮን ተፈራርመዋል፡፡

ስምምነቱ ሶስት ፕሮጀክቶችን ለመደገፍ ይውላል ተብሏል፡፡

ከድጋፉ 200 ሚልዮን ዶላሩ በአነስተኛ እና ጥቃቅን ለተሰማሩ ኢንተርፕራይዞች የሚውል ሲሆን፤ ኢንተርፕራይዞች በኮቪድ-19 ወረርሽኝ ምክንያት ለደረሰባቸው ተጽዕኖ ቢደገፉ በስራቸው አዋጭ ሆነው ለመቀጠልና በንግድ ውስጥ እንዲቆዩ የሚያስችል ነው፡፡

500 ሚልዮን ዶላሩ ደግሞ የኤሌክትሪክ አገልግሎት እና ተደራሽነት ከማሳደግ ባሻገር የግሉ ዘርፍ ካፒታል ተሳትፎን እና ዘላቂ የፋይናንስ አማራጮችን ለማምጣት የሚያስችል አካባቢን ለመፍጠር የሚያስችል ነው፡፡

የ207 ሚልዩን ዶላር ስምምነቱም በኢትዮጵያ ውስጥ የኮቪድ-19 ወረርሽኝ የሚያስከትለውን ጉዳት ለመቀነስ ብሎም የበሽታው መከላከያ ክትባቶችን ውጤታማ እና ፍትሐዊ በሆነ መንገድ እንዲዳረስ ለማድረግ የሚውል የፋይናንስ ድጋፍ መሆኑን ከገንዘብ ሚኒስቴር ያገኘነው መረጃ ያመለክታል፡፡

ስምምነቱ የተፈረመው የጤና ሚኒስትር ዶክተር ሊያ ታደሰ፣ የውሃ መስኖና ኢነርጂ ሚኒስትር ዴኤታ ዶክተር ፍሬህይወት ወልደሃና፤ የኢትዮጵያ ልማት ባንክ ፕሬዝዳንት ዶክተር ዮሐንስ አያሌው እና የፌዴራል አነስተኛና መካከለኛ ማኑፋክቸሪንግ ኢንዱስትሪዎች ማስፋፊያ ባለሥልጣን ዋና ዳይሬክተር አቶ አስፋው አበበ እንዲሁም የኢትዮጵያ ኤሌክትሪክ አገልግሎት ዋና ሥራ አስፈጻሚ አቶ ሽፈራው ተሊላ በተገኙበት ነው፡፡

Comments: 0

Your email address will not be published. Required fields are marked with *

This site is protected by wp-copyrightpro.com