‹‹በመተከል ዞን በሽፍታው ቡድን ቁጥጥር ሥር የነበሩ ቦታዎችን ማስለቀቅ ተችሏል››

Views: 43

በጠቅላይ ሚኒስትር ዐቢይ አሕመድ ተቋቁሞ የመተከል ዞንን የፀጥታ እና የሕግ ማስከበር ሥራን የተረከበው ግብረ-ኃይል በሽፍታው ቡድን ላይ እርምጃ በመውሰድ ተቆጣጥሯቸው የነበሩ ቦታዎችን ማስለቀቅ መቻሉን አስታወቀ።

የፀጥታ እና የሕግ ማስከበር ሥራውን በአንድ ወር ጊዜ አጠናቅቆ ለአስተዳደሩ ለማስረከብ ዕቅድ ነድፎ እየተንቀሳቀሰ ያለው ግብረ-ኃይሉ የሁለት ሣምንት ሥራውን መገምገም ጀምሯል።

ግብረ-ኃይሉ የመተከልን ዞን የፀጥታ እና የሕግ ማስከበር ሥራ ከተረከበ በኋላ በተለያዩ ወረዳዎች እና ቀበሌዎች ከሕዝብ ተወካዮች፣ ከሀገር ሽማግሌዎች፣ ከምሁራን እና ከወጣቶች ጋር ምክክር አድርጓል።

የጥፋት ቡድኑ በንፁሃን ዜጎች ላይ የፈጸመው ማንነትን መሠረት ያደረገ ጥቃት እና የንብረት ውድመት የማንንም ብሔር የማይወክል መሆኑን ኅብረተሰቡ በተለያዩ መድረኮች ስለማረጋገጡም ተጠቁሟል።

የጉሙዝ ሕዝቦች ዴሞክራሲያዊ ንቅናቄ፣ ኦነግ ሸኔ እና ሌሎችም የአማፂው የህወሓት ቡድን አባላት ሙሉ በሙሉ ካልተደመሰሱ በአካባቢው ዘላቂ ሰላም ለማስፈን አስቸጋሪ እንደሚሆንም ተነስቷል።

ከጥፋት ቡድኑ ውድመት የተረፈው የአርሶ አደሮች ሰብልም ከመከላከያ ሠራዊት እና ከፀጥታ ኃይሉ ጋር በመቀናጀት እየተሰበሰበ ነው ተብሏል።

በመተከል ኃላፊነታቸውን ያልተወጡ የወረዳ እና ቀበሌ የሥራ ኃላፊዎች እንዲነሱ፣ ወንጀል ያለባቸውም በሕግ እንዲጠየቁ እየተደረገ ነው።

በተጨማሪም አዲስ የሚመረጡ የሥራ ኃላፊዎች ሕዝብ መምራት የሚችሉት በሕዝብ ፊት ቀርበው ተቀባይነት ሲያገኙ ብቻ በመሆኑ ይህም እየተደረገ ነው ተብሏል።

ትምህርት ቤቶችን የመማር ማስተማር ማስጀመር፣ የጤና ተቋማትን ሙሉ በሙሉ ለአገልግሎት ክፍት ማድረግ እና ተፈናቃዮችን ወደ ቀያቸው መመለስ የቀጣዮቹ ሁለት ሣምንታት ሥራ እንደሚሆንም ተገልጿል።

የሀገር መከላከያ ሠራዊት በሁሉም አካባቢዎች ተሰማርቶ ሕግ የማስከበር ዘመቻ በማከናወኑ በዞኑ አንፃራዊ ሰላም ሰፍኗል፤ የዜጎች የፀጥታ ስጋትም ቀንሷል ተብሏል።

በማወቅም ይሁን ባለማወቅ በተሳሳተ መረጃ ወደ ጫካ የገቡ ዜጎች ወደ ቀያቸው እንዲመለሱ እየተደረገ መሆኑም መገለጹን ኢዜአ ዘግቧል።

Comments: 0

Your email address will not be published. Required fields are marked with *

This site is protected by wp-copyrightpro.com