‹‹የአሜሪካን እርዳታ እገዳ የእንግሊዝን የቅኝ አገዛዝ ዘመን የሚያስታውስ ነው››

Views: 59

የአሜሪካ ውጭ ጉዳይ መስሪያ ቤት ከፕሬዝዳንት ትራምፕ በተሰጠው መመሪያ መሠረት ለኢትዮጵያ ሲሰጠው ከነበረው ደጋፈ ውስጥ 130 ሚሊዮን ዶላር እንዲታገድ ማድረጉ፣ የእንግሊዝ ቅኝ ግዛት ዘመንን የሚያስታውስ መሆኑን ሊዛ ቫይቭስ የተባሉ ተንታኝ መግለጻቸውን ኢንዴፕዝ ኒውስኔት ድረገጽ ዘገበ፡፡

የድጋፍ እገዳው ካካተታቸው መርሃ ግብሮች መካከል የፀጥታ ድጋፍ ፣ የፀረ ሽብርተኝነት እና የወታደራዊ ትምህርት እና ስልጠና ፣ ሕገ-ወጥ የሰዎች ዝውውር መከላከል ሲሆኑ፣ ቅነሳዎቹ ለአስቸኳይ የሰብዓዊ ዕርዳታ፣ ለምግብ ዕርዳታ እንዲሁም ለ ኮቪድ-19 እና ለኤች.አይ.ቪ / ኤድስ የታለሙ የጤና ልማት እገዛዎችን እንደማያካትት ተገልጿል፡፡

የታላቁ የኢትዮጵያ ህዳሴ ግድብ ግንባታ ሊጠናቀቅ ስለመቃረቡ የተናገሩት ተንታኟ፣ ሙሉ በሙሉ ሲጠናቀቅ በአፍሪካ ትልቁ የኤሌክትሪክ ኃይል ማመንጫ ፕሮጀክት ከመሆኑም በላይ 65 በመቶ የሚሆነው ኢትዮጵያዊ የኤሌክትሪክ ኃይል እንዲያገኝ የሚያደርግና ለደቡብ ሱዳን፣ ኬንያ፣ ሱዳን፣ ሶማሊያ እና ታንዛኒያም ኃይል የሚያቀርብ ነው ተብሎ ይጠበቃል፡፡

አሜሪካ የወሰደችው እርምጃ በኢትዮጵያ የልማት ስትራቴጂ ውስጥ በግልፅ ጣልቃ በመግባት ቅሬታን ስለመፍጠሩና የኢትዮጵያን ሉዓላዊነት ስለመጋፋቱ የፖለቲካና ኢኮኖሚ ተንታኙ ሎውረንስ ፍሪማንን እማኝ ያደረጉት ጸሐፊዋ ጉዳዩ ታዳጊ አገራት የህዝቦቻቸውን ህይወት ለመቀየር የሚወስዷቸው እርምጃዎች ላይ የተሰነዘሩ ጥቃቶች ናቸው ብለዋል ፡፡

በ1959 ወንዙን በሚመለከት ስምምነት ሲደረግ ግብፅም ሆነ ሱዳን የእንግሊዝ ቅኝ ግዛት ስር እንደነበሩና ለግብጽም በአባይ ወንዝና ገባሮቹ ላይ ብቸኛ የባለቤትነት ስልጣን የሰጣት መሆኑን ጸሐፊዋ አስታውሰዋል።

አባይን ለመቆጣጠር ወይም በብቸኛ ባለቤትነት ለመያዝ ሙከራ ከማድረግ ይልቅ መተባበር ወቅቱን የሚመጥን እና ግድቡ የተገነባው ከኢትዮጵያውያን ድሃ ገበሬዎች በተሰበሰበ ገንዘብ እንጂ፣ በአለም ባንክ ድጋፍ ያለመሆኑን ጥቁር አሜሪካዊው የሰብአዊ መብቶች ተማጋች ጄሲ ጃክሰን ያብራሩበትን ጽሑፍ አጠናከረውታል፡፡

ጸሐፊዋ ሃሳባቸውን ሲያጠቃልሉ የሰብአዊ መብት ተማጋቹ “ግድቡ ለኢትዮጵያ ውያን ከድህነት መውጫ መሰላል፣ የነጻነትና የብሄራዊ ኩራት ምልክት ስለመሆኑና ህሊና ያላቸውና ሚዛናዊ የሆኑ ሰዎች ሁሉ የአሜሪካ መንግስትና የአለም ባንክ ሰላማዊ በሆነ መንገድ ያላትን የተፈጥሮ ሃብት ተጠቅማ ለመለወጥ በምትጥረው ኢትዮጵያ ላይ ሊጭኑት ያሰቡትን አዲስ የቅኝ ግዛት ዘመን ስምምነት ሊያወግዙት ይገባል” ማለታቸውን ጨምረው አስታውሰዋል።

Comments: 0

Your email address will not be published. Required fields are marked with *

This site is protected by wp-copyrightpro.com