ቅምሻ ከወዲህ ማዶ፡- በያዝነው ሳምንት ኢትዮጵያን ጨምሮ በምስራቅ አፍሪቃ አገራት ከፍተኛ መጠን ያለው ዝናብ እንደሚጠበቅ ተገለፀ

Views: 39

በኢትዮጵያ እና ሌሎች የምስራቅ አፍሪካ የልማት በይነመንግስታት አገራት ከፍተኛ መጠን ያለው ዝናብ ሊጥል እንደሚችል የምስራቅ አፍሪቃ የአየር ንብረት የልህቀት ማዕከል እጠነቀቀ፡፡

ማዕከሉ እንደገለጸው በተለይም በመካከለኛው እና ምዕራብ ኢትዮጵያ እና በሰሜን ምስራቅ ሶማሊያ አካባቢዎች ከባድ ዝናብ ሊጥል ይችላል፡፡

በእነዚህ አገራት የሚጠበቀው ከባድ ዝናብ ሊያደርስ የሚችለውን አደጋዎችን ለመከላከል ባለድርሻ አካላት ተገቢውን እርምጃ እንዲወስዱ የልህቀት ማዕከሉ አስጠንቅቋል፡፡

የዝናብ ትንበያው ከዛሬ ጀምሮ በሚቀጠሉት ሰባት ቀናት ውስጥ የሚጠበቅ ሲሆን፣ በምዕራብ እና መካከለኛው ኢትዮጵያ ጥቂት ቦታዎች ከ 200 ሚሊ ሜትር በላይ ከባድ ዝናብ ይጠበቃል ነው የተባለው፡፡

በማዕከላዊ ኢትዮጵያ እና በጎረቤት አገራት ደቡብ-ምዕራብ ሱዳን፣ ከሰሜን-ምዕራብ እስከ ደቡብ-ምዕራብ ደቡብ ሱዳን፣ በምዕራብ እና ሰሜን-ምስራቅ ሶማሊያ እንዲሁም በሰሜን-ምዕራብ ዩጋንዳ እና ምዕራብ ኬንያ ከ 50 እስከ 200 ሚሊ ሜትር የሆነ መካከለኛ ዝናብ ይኖራል፡፡

በሰሜን፣ በምስራቅ እና በደቡብ ኢትዮጵያ፣ በማዕከላዊ ሱዳን፣ በሰሜን ምዕራብ ኤርትራ፣ በምዕራብ እና ማዕከላዊ ደቡብ ሱዳን፣ በሰሜን እና በደቡብ ሶማሊያ፣በጅቡቲ የባህር ዳርቻዎች፣ በማዕከላዊ እና በምስራቅ ዩጋንዳ አንዳንድ አካባቢዎች ከ 50 ሚሊ ሜትር በታች የሆነ ቀላል ዝናብ ይኖራል ተብሏል፡፡

እንደ የምስራቅ አፍሪካ የአየር ንብረት የልህቀት ማዕከል ትንበያ ከሆነ፣ አብዛኛዎቹ የደቡብ ምስራቅ እና ሰሜን ምስራቅ ኢትዮጵያ ክፍሎች፤ የታንዛኒያ፣ቡሩንዲ፣  ሩዋንዳ፣ ደቡባዊ ኡጋንዳ፣ ከምስራቅ እስከ ሰሜን ምዕራብ ኬንያ፣ደቡብ ምስራቅ ደቡብ ሱዳን፣ ማዕከላዊ ሶማሊያ፣ ጅቡቲ እና የኤርትራ ባህር ዳርቻዎች ደረቃማ የአየር ሁኔታ ያመዝናል፡፡

በሌላ በኩል በማዕከሉ የሙቀት ትንበያ መሰረት በሰሜን-ምስራቅ ኢትዮጵያ አንዳንድ ክፍሎች፤ ሰሜን ሱዳን፣ የኤርትራ ባህር ዳርቻዎች፣ በጅቡቲ እና የሶማሊያ ሰሜን ምዕራብ ጠረፍ ክፍሎች ከ 32 ዲግሪ ሴንቲግሬድ በላይ የሆነ ከፍተኛ ዕለታዊ አማካይ የሙቀት መጠን ይጠበቃል፡፡

የደቡብ-ምስራቅ ኢትዮጵያ ክፍሎች ከ 20 እስከ 32 የሆነ መካከለኛ የሙቀት መጠን ሲጠበቅ፤ አብዛኞቹ ደቡባዊ እና ሰሜን ኢትዮጵያ ክፍሎች ደግሞ ከ20 በታች የሆነ የሙቀት መጠን ይኖራቸዋል ነው የተባለው፡፡

Comments: 0

Your email address will not be published. Required fields are marked with *

This site is protected by wp-copyrightpro.com